Om prosjektet

Prosjektet «Kunnskap kryssar grenser» er finansiert av Transnova-programmet i tillegg til bidrag frå partnarane og frå IT-forum Sogn og Fjordane. Følgjande organisasjonar deltek i prosjektet:

- Vestlandsforsking (prosjektleiing)
- Fylkesmannen i Sogn og Fjordane
- Fylkeskommunen i Sogn og Fjordane
- Innovasjon Norge i Sogn og Fjordane
- Lotteri- og stiftelsestilsynet
- Teknologirådet

Prosjektet skal stimulera til meir bruk av videomøte og nettoverføring (streaming, webcast) for å redusera tal tenestereiser og gjennom det spara miljøet for CO2-utslepp. Prosjektet starta opp i september 2010 og blir avslutta 31.12.2011.

Prosjektet kan gi støtte til arrangørar som ønskjer å overføra seminar o.l. på nettet, enten ved rådgiving eller også ved å gjennomføra sjølve overføringa.

Kunnskap er vår viktigaste ressurs. Vi ynskjer å dele, og få tilgang til meir kunnskap utan å måtte bruke lange, dyre og forureinande dagar på reisefot. Målet er at mange fleire konferansar, seminar og føredrag blir kringkasta på nettet og at nettbaserte møteverktøy blir brukte i mykje større grad enn i dag.

Å tileigne seg kunnskap kan vera dyrt og tidkrevjande. Nettbasert kringkasting opnar nye moglegheiter for Noreg, og kxg.no skal visa veg ved å:

• Formidle kunnskap om korleis du kan kringkaste på nett.
• Gje oversikt over arrangement i Norge som til ei kvar tid vert kringkasta på nett.
• Gje oversikt over tidlegare kringkasta arrangement.

Til trass for at vi har glimrande breibandsdekning, er konferansar, seminar og kurs primært basert på fysisk oppmøte, utan å leggja til rette for «virtuell» deltaking. Det er umogleg å delta i eigen person på alle relevante arrangement, enten dei er regionale, nasjonale eller internasjonale. kXg oppmuntrar til, og kan om nødvendig hjelpe til for å auke nettbasert deltaking på arrangement.